Frá ritstjóra

Þá er komið að því að fylgja tímaritinu Lögfræðingi úr hlaði í sjötta skipti. Að baki útgáfunni liggur mikil en skemmtileg vinna og er ekki laust við að litið er yfir farinn veg með stolti, nú þegar loksins er komið að útgáfudegi. Tímaritið er líkt og lagadeildin sem það fylgir ungt að árum, en þrátt fyrir það tók núverandi ritstjórn við blaðinu á sterkum grunni fyrri ritstjórna og litum við því á það sem okkar hlutverk að halda áfram afram þeirra góða starfi, og styrkja Lögfræðing í sessi sem fræðirit um lögfræðileg málefni. Blaðið í ár, líkt og fyrri ár, kemur víða við enda ætlað að höfða til fjölbreytts hóps lesenda. Útkoman er að okkar mati sérstaklega áhugaverð, og inniheldur að þessu sinni ritrýndar greinar, bæði reyndra fræðimanna og nýútskrifaðra lögfræðinga. Við erum afar stolt af útkomunni og þökkum við öllum þeim fræðimönnum sem lögðu til ritsins með skrifum sínum, kærlega fyrir. Auk þess vil ég fyrir hönd ritstjórnarinnar árið 2012 þakka öllum þeim sem komu að útgáfu blaðsins að þessu sinni, bæði með styrkjum og vinnu sinni. Stuðningur við útgáfur sem þessar eru sérstaklega mikilvægar því fræðasviði sem þær fylgja hverju sinni. Með þeim skapast ekki einungis vettvangur fyrir skoðanir og fræðiskrif reyndari menntamanna heldur einnig fyrir hina yngri og óreyndari sem vilja fá kost á að kynna hugmyndir sínar og blanda sér í fræðiumræður hinna eldri.

Að lokum óska ég nýkjörinni ritstjórn farsældar í komandi starfi.