Frá ritstjóra

Það er með fögnuði sem stjórn Þemis, félags laganema við Háskólann á Akureyri, og ritstjórn Lögfræðings færir ykkur 1. tbl. 3. árg. tímaritsins. Deildin okkar er ekki gömul en hefur á þeim stutta tíma sem hún hefur verið starfrækt náð að festa sig í sessi og sanna gildi sitt. Á vormánuðum 2008 voru fyrstu nemarnir með M.L.-gráðu í lögfræði útskrifaðir frá skólanum. Á því tæpa ári sem liðið er frá útskrift þeirra hafa þeir sýnt það og sannað hversu vel laganemar frá háskólanum hér norðan heiða eru í stakk búnir að takast á við hin ýmsu verkefni að útskrift lokinni. Er það einlæg ósk okkar sem að þessari útgáfu komum að þeim farnist áfram vel í námi og starfi. Þess má þá jafnframt geta að haustið 2008 bættist við flóru lögfræðináms á Íslandi er nám til LL.M.- og M.A.-gráða í heimskautarétti hófst við skólann. Auk þess er boðið upp á diplómunám á bæði meistara- og bakkalárstigi í fræðunum. Það er því full ástæða til að segja að bjart sé yfir lagakennslu við Háskólann á Akureyri.

Í ritstjórn Lögfræðings þetta árið eru eingöngu konur. Þá er stjórn Þemis einnig að mestu skipuð konum. Það var m.a. af þessum sökum sem ákveðið var að beina sjónum að meginstefnu að stöðu kvenna, hlutverki þeirra og áhrifum innan lagaumhverfisins í útgáfunni. Því þótti vel við hæfi að útgáfudagur tímaritsins yrði 8. mars, Alþjóðlegur baráttudagur kvenna. Í tímaritinu birtast þó einnig aðrar greinar er ekki tengjast ofangreindu efni.

Fyrir hönd ritstjórnar færi ég greinarhöfundum og öðrum þeim er komu að útgáfu tímaritsins bestu þakkir fyrir vel unnin störf. Þrátt fyrir erfitt árferði er ljóst að það er leikur einn að standa að útgáfu sem þessari þegar allir leggjast á eitt og láta hendur standa fram úr ermum.