Klám og ofbeldi - Hvernig kemur það körlum við?

Starfshópur um karla og jafnrétti, sem skipaður var af velferðarráðherra til að fjalla um hlut karla í jafnréttismálum hefur nú skilað skýrslu til ráðherra með fimmtán tillögum að sérstökum aðgerðum, rannsóknum og verkefnum. Vinna starfshópsins er liður í áætlun ríkisstjórnarinnar í jafnréttismálum fyrir árin 2011–2014.

Um verkefni starfshópsins segir að hann skuli gera tillögur um hvernig auka megi þátttöku karla í umræðu um jafnréttismál og auka aðild karla að jafnréttisstarfi. Það skuli meðal annars gert með umfjöllun um kynskipt náms- og starfsval, þátttöku karla í verkefnum fjölskyldunnar, áhrif staðalmynda á stöðu karla í íslensku samfélagi og tengslin milli heilsu, heilbrigðis og kynjasjónarmiða.

Í erindi sínu á lögfræðitorgi fjallaði Tryggvi Hallgrímsson félagsfræðingur og sérfræðingur á Jafnréttisstofu um tvö sérstök áherslusvið starfshópsins: Annarsvegar klám og vændi, hinsvegar ofbeldi og ofbeldismenningu. Umræðan tekur mið af stöðu þessara málaflokka í dag og tillagna starfshópsins um aðgerðir, verkefni og þörf fyrir rannsóknir.